ИДОМАИ ТАНТАНАҲОИ ИДОНА БАХШИДА БА ИСТИҚБОЛИ НАВРӮЗИ ФАРРУХПАЙ ДАР НОҲИЯИ ФИРДАВСӢ

Субҳи санаи 21 марти соли ҷорӣ дар қатори дигар ноҳияҳои ҳудуди пойтахт, масъулин ва сокинони ноҳияи Фирдавсии шаҳри Душанбе низ дар якҷоягӣ бо кормандони корхонаву муассисаҳо ва сокинони шаҳраку маҳаллаҳо дар даромадгоҳи дарвозаи ҷанубии пойтахт фарорасии ҷашни бостонии Наврӯзро бо шодиву сурур ва рақсҳои мавзун ва бо ба бар намудани қабои идонаи миллӣ таҷлил намуданд. Корвони Наврӯзии ноҳия аз самти воридгоҳи ҷанубии шаҳр ба роҳ баромада ба самти боғи фарҳангӣ - фароғатии ба номи А. Фирдавсӣ ҳаракат намуд. Сокинону фаъолони ноҳия бошанд, таҳти танини садои карнаю сурнай тариқи шоҳроҳ мардумро аз хоби ноз бедор намуда, муждаи фарорасии баҳору Наврӯзро расониданд. Ёдовар мешавем, ки ҷашни Наврӯз яке аз ҷашнҳои куҳантарини миллии миллати фарҳангсолори тоҷик ба ҳисоб рафта, фитрати асосии онро ғояи "Пиндори нек, гуфтори нек ва рафтори нек" ташкил медиҳад. Чорабиниҳои идона бахшида ба куҳанҷашни аҷдодиамон Наврӯз дар ноҳияи Фирдавсӣ идома дошта, масъалаи мазкур зери таваҷҷуҳи бевоситаи роҳбарияти ноҳия қарор дорад.