БАРГУЗОРИИ ЧОРАБИНИИ ТАНТАНАВӢ БАХШИДА БА 32- ЮМИН СОЛГАРДИ ТАЪСИСЁБИИ ҚУВВАҲОИ МУСАЛЛАҲИ ҶУМҲУРИИ ТОҶИКИСТОН ДАР НОҲИЯИ ФИРДАВСӢ

Санаи 21 феврали соли 2025 дар толори Донишгоҳи байналмилалии сайёҳӣ ва соҳибкории Тоҷикистон бахшида ба 32- юмин солгарди таъсисёбии Қувваҳои мусаллаҳи Ҷумҳурии Тоҷикистон бо иштироки муовини Раиси шаҳри Душанбе Одилзода Дилбар Раҳим, И.в. вазифаи Раиси ноҳияи Фирдавсӣ Сафарзода Дилшод Ғанӣ, муовинони Раиси ноҳия ва дигар фаъолону кормандони соҳаҳои гуногуни ҳаёти ҷамъиятӣ чорабинии идона ташкил ва баргузор гардид. Дар чорабинии тантанавӣ муовини Раиси шаҳри Душанбе Одилзода Д. ҳозиринро аз номи худ ва Раиси шаҳри Душанбе, муҳтарам Рустами Эмомалӣ ба муносибати ҷашни мазкур таҳният гуфта, ба афсарону сарбозони Қувваҳои мусаллаҳи кишвар неруву матонати қавӣ ва азму иродаи солорро таманно намуд. Дар баромади расмии И.в. Раиси ноҳияи Фирдавсӣ, муҳтарам Сафарзода Дилшод Ғанӣ аз муҳимияти артиш ҳамчун сипари боэътимоди давлат дар замони муосир ибрози андеша сурат гирифта, қайд гардид, ки маҳз дар натиҷаи заҳматҳои шабонарӯзии Пешвои муаззами миллат, Сарфармондеҳи Олии Қувваҳои мусаллаҳи Ҷумҳурии Тоҷикистон, Президенти кишвар, муҳтарам Эмомалӣ Раҳмон артиши миллии мамлакат ба неруи муқтадир ва ҳимоятгари марзу бум, инчунин манфиатҳои миллии ҷомеа ва давлати Тоҷикистон табдил ёфтааст. Дар идома, чорабиниро ҳунарнамоии дастаи ҳаваскорони назди Мақомоти иҷроияи ҳокимияти давлатии ноҳия ва санъаткорони шинохта зиннат дода, ба он ҳусни тоза зам намуд.