БАРГУЗОРИИ ФЕСТИВАЛИ ҶУМҲУРИЯВИИ “САД РАНГИ ЧАКАН” ДАР НОҲИЯИ ФИРДАВСИИ ШАҲРИ ДУШАНБЕ

Санаи 13 феврали соли 2025 бо ибтикори Мақомоти иҷроияи ҳокимияти давлатии ноҳияи Фирдавсии шаҳри Душанбе даври ноҳиявии фестивали “Сад ранги чакан” ва намоиши ҳунарҳои мардумӣ аз қабили нақшдӯзӣ, чакану гулдӯзӣ ва дигар намуди маҳсулоти ҳунарӣ баргузор гардид. Дар ин чорабинӣ гулдухтарони чаканпӯш ва ҳунармандон аз маҳаллаҳо ва шаҳракҳои ноҳия, донишҷӯёни донишгоҳҳо, коллеҷу, литсейҳо, муассисаҳои таълимию томактабӣ ва дигар намояндагони ташкилоту идораҳои ноҳия ширкат варзиданд. Фестивал аз рӯйи 6 номинатсия: намоиши либосҳои қадимии чакан, либосҳои кӯдакона, либосҳои рӯзмарра, либосҳои маросимӣ ва идона, либосҳои расмӣ ва намоиши навъҳои гуногуни сӯзанидӯзӣ гузаронида шуд. Зимни баргузории ин фестивал иброз гардид, ки ҳадаф аз ташкили чунин чорабинӣ гиромидошти арзишҳои асили фарҳанги миллиамон буда, он ба тарғибу ташвиқи либоси миллӣ, баланд бардоштани эътибори нақшу нигор, сӯзанидӯзиву гулдӯзии матоъҳои миллӣ ва намоиш додани ҳунари волои тарроҳону ҳунармандони ватанӣ равона мегардад. Фестивали мазкур дар самти баланд бардоштани эҳсоси ватандӯстию худшиносӣ, ифтихори миллӣ, арҷ гузоштан ба таъриху тамаддун, фарҳанг, расму оинҳои миллию мардумӣ, муаррифии санъату ҳунари волои халқи тоҷик дар арсаи байналмилалӣ ва баланд бардоштани мақому манзалати либоси миллӣ ба ҳиссагузорӣ намуда, бори дигар асолати фарҳангии миллати тамаддунофари тоҷикро ба ҷаҳониён иблоғ менамояд.